இது தோற்றவர்களின் கதை எங்க கதை கிடையாது 2..களம் காணாமலே கைதான JVP தலைவர்

 1971 மார்ச் மாதம். தெலுந்தனியாவில் உள்ள மறைவிடம் ஒன்று.
 தோழர்களே நான் தலைவர் றோகணவை சந்திக்க அம்பாந்தோட்டை செல்கிறேன். நான் வரும்வரை தோழர் சகோதரி பிரேமாவதி இந்த முகாமிற்கு பொறுப்பாக இருப்பார் அவர் கூறும் கட்டளைகளுக்கு அனைவரும் கட்டுப்பட்டு செயற்படவேண்டும் என கேட்டுக்கொள்கிறேன். கிளர்ச்சிக்குரிய நாள் குறிக்கப்பட்டுவிட்டது. உங்களால் முடிந்தவரை அதிகளவான வெடிபொருட்களை தயார் செய்யுங்கள். மேலதிக விபரங்களை பிரேமாவதியிடம் கேட்டு அறிந்து கொள்ளுங்கள். 

தலைவர் வாழ்க சேயின் பாதையில் புரட்சி ஓங்குக.
        
அண்ணன் போட்டார்தானே என்று ஜாலியாக இருக்காமல் வேலைகளை தொடங்குவம்.

பெரேராவின் லேத் பட்டறைக்கு போதுமான அளவு 5 அங்குல விட்டமுள்ள இரும்புக்குழாய்கள் அனுப்பப்பட்டுள்ளது. சரத் நீங்கள் அங்கு சென்று அதில் ஒரு அடி நீளமுள்ள வெடிகுண்டிற்கான கோதுகளை தயார் செய்யுங்கள். ஞாபகம் இருக்கட்டும் நீங்கள் சென்றதடவை செய்த கோதுகளில் தயாரித்த குண்டுகளில் 3 பரீட்சித்து பார்க்கப்பட்டது குழாயில் ஒட்டிய மூடித்தகடுகள் சரியாக ஒட்டப்படாததால் வெடிக்கும்போது அதிக அமுக்கம் கிடைக்காமல் சேதம் குறைவாகவே இருந்தது. ஒட்டும்போது அதிக கவனம் எடுத்து ஒட்டுங்கள்.

இல்லை பிரேமா அக்கா நான் வடிவாத்தான் ஒட்டினனான்.
 
காரணங்கள் சொல்லுறதைவிட்டிட்டு இனிமேல் அக்கறையெடுத்து வேலையை கவனியுங்கோ. ஹேரத் நீக்கள் பின் அறையில் இருக்கும் கோதுகளுள் வழமைபோல இரும்புத்துண்டுகள், கண்ணாடித்துண்டுகள் வெடிமருந்து ஆகியவறை கலந்து நிரப்புங்கள்.  தேவையான டெட்டினேற்றர்குச்சிகள் இல்லாவிடில் சொல்லுங்கோ தருகிறேன். நிரப்பும்போது ஒரு மரக்குச்சியினால் மெதுவாக அழுத்தி பூரணமாக நிரப்புங்கள் மருந்தை அளவுக்கு அதிகமாக அழுத்தி இடித்து தள்ளவேண்டாம். வெடித்துவிடக்கூடும்.

சந்திரிகா நீ வெற்று சோடாபோத்தல்களினுள் கண்ணாடித் துண்டுகளையும் பெற்றோலையும் நிரப்பி மூடி ஒட்டு.

ஜலத் நீ தயாரான பொருட்களை மீன் அனுப்பும் பெட்டிகளில் அடுக்கி குலுங்காதவாறும் மேலே தெரியாதவாறும் மரத்தூளினால் நிரப்பி அனுப்புவதற்கு தயார் செய்துவை. நாளை காலை அவற்றை எடுத்துப்போக மீன் லாரி வரும்.

நான் ஊருக்குள் சென்று காலை உணவிற்கு பாண் வாங்கி வருகிறேன். இந்தப்பகுதியில் வெளி ஆட்கள் நடமாட்டம் இருப்பதாக ஊருக்குள் பேசிக்கொள்கிறார்கள் யாரும் தேவையில்லாமல் வெளியே செல்ல வேண்டாம்.

நங்கி மட்ட சிகரட் பக்கற் எக்காக் அறங் எண்ட.( தங்கச்சி எனக்கொரு சிகரட் பக்கற் வாங்கிவாங்கோ.)

ஹேரத் உனக்கு எத்தனைதடவைதான் சொல்லுறது இங்கு சிகரட் பத்துவது ஆபத்தானது என்று.

நங்கி அத வித்தறாய் (தங்கச்சி இன்றைக்குமட்டும்.....)

முடியாது

ங்கொய்யாலே இவளும் இவளின்ரை சட்டங்களும். சீக்கிரமா நாட்டை பிடிச்சிட்டமென்றால் தலைவரைக்கேட்டு ஊரில ஒரு ஐஸ்வாடி கட்டிக்கொண்டு செற்றிலாகிவிடுவன். மச்சான் தீப்பெட்டி இருக்கே தா ஒரு சிகரட் பத்துவம்.

ஹேரத் உனக்கு எத்தனை தடவை சொன்னாலும் கேட்கமாட்டியே. ஒருநாள் இல்லையென்றால் மற்றொருநாள் கூண்டோட கைலாயம் போறதென்று முடிவு எடுத்திருக்கிறியே? பேசாமல் மருந்து அடையிற வேலையை பார்.

போடா புறம்போக்கு அட்வைஸ் பண்ணுறானாம் அட்வைஸ். சிகரட்டில கஞ்சா கலந்து இழுத்தால்தான்டா எனக்கு பதட்டமில்லாமல் வேலை நடக்கும்.

லஸ்சன லஸ்சன மல் பிப்பிலா லா லலா.... (அழகான அழகான பூக்கள்...
 பூத்திருக்கு....)

கோவிச்சுக்கத்துறது ,பாடுறது, ஆடுறதென்று, நீ எந்த நேரம் என்ன செய்வாய் என்று புரிஞ்சுக்கவே முடியது ஹேரத்.


டமால் டமால்.... என குண்டு வெடிக்கும் சத்தங்களும்.

தொடர்ந்து அணே மகே அம்மே....(ஐயோ அம்மா...)என்ற கத்தலும்....  



 

இந்தச்சம்பவம் JVP கிளர்ச்சியை சீக்கிரமே ஆரம்பிக்க காரணமாக இருந்த வெடிவிபத்து சம்பவத்தை பின்னணியாக கொண்டு புனையப்பட்ட நிஜம் கலந்த கற்பனை கதை
 

ஐஸ்வாடி - பிடித்த மீன்களை பழுதடையாமல் ஐஸ் போட்டு பாதுகாத்து வைக்கும் இடம்

டெட்டினேற்றர்குச்சி - வெடிப்பை உண்டுபண்ண தேவையான ஒரு பொருள்

இந்தச்சம்பவ பின்னணியுடன் தோற்றவர்களின் கதை தொடர்கிறது.



களம் காணாமலே கைதான JVP தலைவரும் கடைசிவரை களத்தில் நின்ற எங்கள் தலைவரும்

எங்கள் தலைவர் பிரபாகரன் பேசுவது குறைவது செய்வது அதிகம். இதற்கு நேர்மாறானவர் JVP தலைவர் றொகண விஜயவீர. 
றோகண தனது பேச்சுவல்லமையினால் அவர் முதலில் சேர்ந்திருந்த கம்யூனிஸ்ட் கட்சியின் பிரச்சாரப்பிரிவில் பணியாற்றியவர். இந்த பேச்சு வல்லமையால் அவரால் இலகுவாக இளைஞர் மனதை கவர்ந்து தனது பக்கம் இழுக்கமுடிந்தது.

இலங்கையின் தென்மாகாணத்தை அண்டிய பகுதிகள் சிங்கள ஆட்சியாளர்களால் கண்டுகொள்ளப்படாமல் மிகவும் பின் தங்கிய நிலையலேயே இருந்தது. இப்பகுதியில் பெரும்பான்மையினராக கரவா என்று அழைக்கப்படும் கடற்தொழில் செய்யும் பிற்படுத்தப்பட்ட சாதியினரே வாழ்ந்து வந்தனர். ஆனால் பிரபல சிங்கள அரசியற்கட்சிகள் உயர் சாதி மத்திய பிரதேச சிங்களவர் ஆதிக்கத்திலேயே இருந்தது. இதுவே இந்தப் பிரதேசங்களின் பின் தங்கிய நிலைக்கு முக்கிய காரணமாகும்.

றோகண இப்பகுதிகளை சேர்ந்த மாணவர்கள், வேலையில்லாத இளைஞர்கள் மத்தியிலேயே தனது கட்சியை வளர்த்தார்.

 JVPயில் இணையையும் இளைஞர்கள் 25 முதல் 30 பேர் கொண்ட குழுக்களாக்கப்பட்டு அவர்களுக்கு இரகசிய இடங்களில் ஒருவாரகால பயிற்சி வழங்கப்பட்டது.
இங்கு அவர்களுக்கு
1. அன்றைய இலங்கையின் பொருளாதார பிரச்சனைகள்
2.இலங்கையிலுள்ள கம்யூனிஸ்ட்டு கட்சிகளின் செயற்பாட்டு தோல்வி.
3.ஆசிய பிராந்தியத்தில் இந்தியாவின் ஆதிக்க விரிவாக்கமும் அதனை தடுக்கவேண்டியதன் அவசியமும்.
4.அமெரிக்க எகாதிபத்தியமும் அதை எதிர்க்கவேண்டிய தேவையும்.
5.இலங்கையில் ஒரு புரட்சியின் தேவை
ஆகிய தலைப்புக்களில் அரசியல் வகுப்புக்களும் சிறிய அளவு இராணுவப் பயிற்சியும் கொடுக்கப்பட்டது.

பெரும்பான்மையான இலங்கை தமிழரும் இந்தியாவை தமது தாய்நாட்டைவிட அதிகமாக நேசித்தனர். இவ்வறு இருக்கையில் JVPயின் 5 முக்கிய கொள்கைகளில் ஒன்றாக
ஆசிய பிராந்தியத்தில் இந்தியாவின் ஆதிக்க விரிவாக்கமும் அதனை தடுக்கவேண்டியதன் அவசியமும் என்ற விடயமே அக்கட்சியில் தமிழ் இளைஞர்கள் அதிகம் இணையாமைக்கு முதற்காரணமாக அமைந்தது.

1971 ஆம் ஆண்டு மார்ச் மாதத்தில் ஒரு வெடி விபத்து நடந்தது. கேகால மாவட்டத்தில் உள்ள நெலுந்தெனிய என்னும் இடத்திலுள்ள மறைவிடம் ஒன்றில் வைத்து JVPயினர் குண்டுகள் தயாரித்துக்கொண்டிருந்த நேரத்திலேயே இந்த விபத்து இடம் பெற்றது. இதனை விசாரிக்கத்தொடங்கிய பொலிசாருக்கு ஆச்சரியமான செய்தியொன்று கிடைத்தது. வெடிவிபத்தின் பின்னணியும், JVPயின் கிளர்ச்சிக்கான ஏற்பாடுகள் சம்பந்தமான தகவல்களே அது.
சுதாகரித்துக்கொண்ட இலங்கை அரசு உடனடியாகவே றோகணவை கைது செய்து அதிகூடிய பாதுகாப்பு கருதி யாழ்ப்பாணத்தில் தடுப்புக்காவலில் வைத்தது. விசாரணைகளையும் தேடுதல்களையும் முடுக்கிவிட்டது. 

இவ்வாறான பிரச்சனைகளினால் ஏற்பட்ட நெருக்கடி நிலைமையில் தப்பி தலைமறைவாகியிருந்த முக்கிய JVP தலைவர்கள் திட்டமிட்ட நாளிற்கு முன்னதாக ஏப்பிரல் 5ம் திகதி இரவு 11 மணிக்கு அரசுக்கு எதிரான கிளர்ச்சியை ஆரம்பிப்பது என முடிவு செய்தனர்.


தோற்றவர்களின் கதைமேலும்  தொடரும்.....

படங்கள் நன்றியுடன் கூகிள் தேடலில் பெற்றுக்கொண்டவை.